الطّهور الديمقراطي

نهار 23 أكتوبر المجيد في الشهر الثامن من العام الأول من ثورة الهشتك بشتك باش يصادف يوم عظيم برشا في حياة التونسين كيما يقولو في الصحافة التونسية والي من عهد بن علي و الأيام الكلّ عظيمة علينا حسب نفس الصحافة إلي مزالت موجودة وقايمة بنفس الوجوه و نفس المضمون فقط مع تغير في الأسماء و المّشتّوم

نهار 23 أكتوبر باش يتوجه شعب بلاد الكنتّول العظيم شيبا وشبابا نساءا و رجالا إلى صناديق الإقتراع ويمارسوا حقهم في الإنتخاب و ينجحوا ثورة الياسمين كيما سماوها الفرانسين و هكاكة نوليو ناس متقديمن أكثر من التقدم بيدو و تفيض علينا الديمقراطية لين تخرج من عينينا

أنا زادة نهار 23 أكتوبر المجيد باش نقوم الصباح بكري لكن منيش باش نتوجه لمركز الإفتراء و إنما باش نتوجه لأقرب قهوّة في الحومة و نهبط وحدة إكسبراس عاقدة بلاش سكر دفع رباعي و نطلب من القهواجي أنو يحطلي غناية الأطلال لأم كلثوم ونقعد نتأمل في الجوه القادمة من كل فج عميق يدها مسخة بالحبّر متع الديمقراطية

أكيد برشا ناس باش تقلي إنتي مواطن سلبي و ممكن برشا تكون من فلول النظام البائد و الله يهلكو إلي علمكم هالكلمة القومجيّة و تحب تفسد علينا العرس الديمقراطي

طبيعي أنو صاحب الحجّة هاذي إلي يحكي على عرس و أنا في الحقيقة ماني نشوف كان في طهور ديمقراطي موش باش يتم إستعمال البنج فيه بالطبيعة ينسى أنو هو من قبل أنو يدخل في أنتخابات جنبا إلى جنب مع إلي يسميهم فلول النظام البائد و هو إلي باش يمشي ينتخب نهار23و يصوت (نشالله يسوطوه)في انتخابات فيها تجمعين

الحجة هاذي تندرج في إطار إكذب إكذب حتى تصدق نفسك و كذلك يمكن إدرجها في إطار الجمل ميراش حدبّتو ولو أنها كلها ربات الحدبّة من التطبيس و التلحيس

و بالتالي السؤال المنطقي و صيغة الموضوعية متاعو تكون كالأتي ...(علاش يا تيتوف ماكش ماشي نهار 23 تنتخب)

هكّة نجم نوضح موقفي ملي نسميه أنا فيستفال متع تهريج و نوضح علاش

أولا الكلام الي يقولو فيه حول استحالة إمكانية تزوير الإنتخابات في الصندوق هو كلام سليم و معقول لكن نساو الي التزوير ميتمش داخل الصندوق و حتى في عهد بن علي نفسو كانت العمليّة متع تزوير تصير خارج الصندوق

اليوم في تونس الأحزاب السياسية زادمة قوة فلوس ..إعانات...رشاوي..تبلعيط..رحالات...فلوس..هبات..شريان ذمم من غير برامج واضحة و الا مواقف ثورية تتمشى مع تطلعات شعب الكنتول العظيم في الكرامة و الحريّة و العدالة الإجتماعية

إضافة انو برشا أحزاب و الي تعتبر مرشح بارز للفوز في "الطهور الديمقراطي" تملك امكانيات مالية ضخمة "ناس تحكي بميات الملاين كاينها تحكي على عشرة ألاف " من دون أنها توضح لرأي العام التونسي مصدر الأموال هاذي و الي تحكي معاه يلك خويا مصادرنا منخرطينا ؟؟يعني ميزيش مشبوه و كمّل يكذب عيني عينك وكينو أحنا جاين من المريخ و إلا مناش عيشين معاهم في البلاد تو بلاد ربع شعبها ضاربو الفقر و مليون بطال و الهم و السخط و عاملة ثورة افرزها و اقع إجتماعي و إقتصادي متردي منين باش يجيب منخرطي أحزابها إلي هوما من الشعب هذا ميات الملاين ؟؟اللهم ممكن ثورة كرزّ و عداوها علينا

هاذي نقطة يعني ثمة إمكانية كبيرة أنو حزب من الأحزاب يجيب غالبية بشريان أصوات الناس و هكاكة خويا التونسي تكون بالرسمي شاركت في طهور متع ديمقراطية

النقطة الثانية و هي بالأساس تتعلق بمسألة تقنية منيش باش نحكي عالهيئة و التجاوزات و منين جات الهيئة هاذي و كفاش لأنو الموضوع هذا برك تحبلو 10 تدوينات

و إنما باش نحكي عالإعلام ...بالله فهموهالي هاذي كفاش تحكيو على إنتخابات ديمقراطية بإشراف إعلام بن علي

و كفاش تحكيو على إنتخابات نزيهة تحت ظل وزير اول مهوش حاشم كي يعترف انو زور انتخابات في عهد سابق و في ظل رئيس دولة ساهم في دعم الديكتاتورية و الإبقاء عليها

ياحاجتين يا أحنا بهايم برشا يا إنتم تصكو في حبوب الهلوسة إلي حكى عليها القذافي باش متراوش الشي هذا الكل

ونزيد زيادة اللاعب الأهم هو وزارة الداخلية يا بوقلب الي لليوم تحكي التقارير الحقوقية على تجاوزات مصارتش حتى ممكن في عهد بن علي و خلي عاد باش نحكيو على التجمعين الي ولاو نظاف وملي كانو جزء من الديكتاتورية باش يوليو جزء من تونس الجديدة و بالطبيعة المجلس التأسيسي مهوش باش يكون خالي منهم كيما الاحزاب الي طارحة نفسها ليوم كأحزاب معارضة لاحزاب السلطة مهاش خالية منهم و هكاكة مع شويّة تحالفات امورهم تولي هانية ويكثرو كالقرّاد وتولي عندهم كلمة

ثمة حاجة مهمة أخرى متخلنيش نمشي نهار 23 هو الإضراب الجوع الي عملوه جرحى الثورة والي بسبهم سيادتك ولّى عندك الحق تمشي تصوت في الطهور الديمقراطي بعد الي حكومة الغلبّة و رقود الجبانة منفذتش وعودهم ليها و كمل الي قتلو الشهداء فيهم شكون ترى و فيهم شكون غطاو عليه وجات في اك راس المغبون السرياطي لا قيم في والديه كان عامل و الا موش عامل في لخر هاكي نهاية الي يتبع الطحانة هوما يفصعو وتجي في راسوا

يعني مكانتش ثمة محاسبة و لا تحقيق جدّي يبرد على قلوب الإميمات إلي تحرقت على ولادها

كمّل الناس الكل و أغلب الاحزاب الي تتبنى خطاب مزدوج وقريبة برشا من الفوز بالسلطة متحكيش على تونس توّ و"توّ" موش متع اك الإنتهازي الي يوزع في الدخان على المراهقين سليم الرياحي و انما تونس توّ ...العدالة....المحاسبة...المصالحة الوطنيّة .