هاو كفاش تبيع القرد و تضحك على شاريه في بلاد الكنّتول

عزيزي التونسي هل كنت جزءا من النظام البائد عندما اندلعت الثورة في تونس ؟وهل أخافك هدير المحتجين في الشارع وهم يطالبون برأس النظام ؟؟

لا تتحسس رقبتك و لا تخف فمن أسهل الأمور في بلادنا هي عملية بيع القرود و الضحك على من يشتريها

عزيزي التونسي مهما كان تمثيلك في النظام البائد ..صحفيا..ناطقا رسميا..منخرطا بالحزب لا تخف

فمن السهل استغناء هذا الشعب فقط اتبع هذه الخطوة

انتظر الشارع حتى يهدأ قليلا و يدخل الثوار في صراعات جانبية فثورتنا العظيمة لم تحمل برنامجا و بالتالي فمن السهل أن تنقض على نفسها و تنحرف عن مسارها

حينها عليك أن تتشجع و ان تخرج من كهفك و تنحاز الى الفئة الغالبة و تشتم بلا رحمة اعداء الغالبية فهم شواذ جنسيا و عملاء فرنسا و لما لا كلاب ساركوزي

تحدث في الإعلام عن الغالبية و لما لا صفهم بالفرسان حينها سوف ينسى الناس ما فعلته و سيصمون أذانهم عن كل حرف قذر كتبته او صرحت به في حق الشعب داعما الديكتاتورية

لسؤال عن مدى فاعلية هذه الخطوة يرجى الاتصال بسمير الوافي و برهان بسيس

سيدي بوزيد الثورة من جديد

هي سيدي بوزيد مرّة أخرى تجد نفسّها منتفضة صارخة "جبّالي يا جبان ...البوزيدي لا يهانّ" كما صرخت من قبل الرابع عشر من جانفي "بن علي يا جبّان البوزيدي لايهان"

بعد أن وجدت طرق التهميش لمدينة عاشت الإقصاء طيلّة ربع قرن منفذا جديدا لكن هذه المرّة بإسم الديمقراطية

أبناء المدينّة الذين ذهبتم غالبّ أصواتهم للعريضة الشعبيّة التابعة للهاشمي المنشق عن الإتجاه الإسلامي و الراقص بين الحبّال كما يصفه المراقبون وسط حديث عن ملفات فاسد مرتبطة بوكالة الإتصال الخارجي زمن بن علي

أبناء المدينّة صدمهم اسقاط القوائم التي صوتوّ لها أملا في إبن  جهتهم الذي وعدهم بعهد جديد يحقق فيه استحقاقات الجهة من تنمية و مكانة سياسية وتأثير في دوائر القرار

بلّ الأمرّ لم يكن مقتصرا على اسقاط القوائم فقط بل تجاوز ذلك الى حملة شعواء من الشتم و التشكيك و حتى الوصاية على من إنتخبوا العريضة

الأمر الذي ساءهم كثيرا فأنطلقوا فيما يصفونه ثورة جديدة بعد أن كانوا يعتقدون أن زمن الظلم و التهميش قد مضى مطالبين بإنصافهم و احترام قرارهم

هؤلاء الذين يعيشون في أعماق تونس و الذين خاطبهم محمّد عبو بلغة الفايس بوك متناسيا أن من لا يجد قوت يومّه لا يملك ضرورة ربطا بشبكة الأنترنات

هؤلاء الذين لا نسمع عنهم إلا في صفحات الحوادث و التي تكتب عرضا حتى تملىء الجرائد الصفراء أو حين نتخذهم محلا لنكاتنا السخيفة و من الامهم و لهجتهم مادة لتسليّة

هؤلاء ظلموا مرتين مرة زمن الديكتاتورية ومرّة زمن الديمقراطية ليجدوا أنفسهم ضحيّة لصراع أيدلوجي لا ناقة لهم فيه و لا جمل

خويا الناخبّ أختي الناخبّة

أخي الناخب و أختي الناخبّة

شنوّة شعورك و التجمع خذى شرعيّة ودخل للمجلس التأسيسي بأكثر من كرسي ؟موش قالولك المجلس التـأسيسي باش يقطع عليهم الطريق وميرجعوش ؟

أخي الناخب أختي الناخبّة

شنوة شعورك ورهطّ كيما الهاشمي الحامدي دبّر 10 بليما من المجلس التشعويذي ؟موش قالولك باش نقوصو الطريق على طبّالة بن علي و الانتهازين و الي ساهموا في دعم الدبكتاتور

خويا الناخب أختي الناخبة

شنوة شعورك وقت جرحى الثورة تعفنت و عاملة إضراب جوع مطالبة على حقوقها و أقلها حقّها في الرعاية الصحيّة ؟

خويا الناخب أختي الناخبة

شنوّة شعورك و قت واحد كي حمة و العويني يقعدو "فيراج "يتفرجو في الترح واحد كي صابر بن فرج يدخل للمجلس التأسيسي؟

أكيد خويا المواطن مهوش شعور تحفون و باش تحس بالقهر ؟لكن الي حاسس بيه موش قهر و انما وقفت على حقيقتك "غبي "و صارك كيما الي يبيع القردّ ويضحك على شاريه

على هاكة خويا الناخب غمّ على راسك و ارقد و كان جات دنيا دنيا راك الصبح الي في لحبار قصيتو

الطّهور الديمقراطي

نهار 23 أكتوبر المجيد في الشهر الثامن من العام الأول من ثورة الهشتك بشتك باش يصادف يوم عظيم برشا في حياة التونسين كيما يقولو في الصحافة التونسية والي من عهد بن علي و الأيام الكلّ عظيمة علينا حسب نفس الصحافة إلي مزالت موجودة وقايمة بنفس الوجوه و نفس المضمون فقط مع تغير في الأسماء و المّشتّوم

نهار 23 أكتوبر باش يتوجه شعب بلاد الكنتّول العظيم شيبا وشبابا نساءا و رجالا إلى صناديق الإقتراع ويمارسوا حقهم في الإنتخاب و ينجحوا ثورة الياسمين كيما سماوها الفرانسين و هكاكة نوليو ناس متقديمن أكثر من التقدم بيدو و تفيض علينا الديمقراطية لين تخرج من عينينا

أنا زادة نهار 23 أكتوبر المجيد باش نقوم الصباح بكري لكن منيش باش نتوجه لمركز الإفتراء و إنما باش نتوجه لأقرب قهوّة في الحومة و نهبط وحدة إكسبراس عاقدة بلاش سكر دفع رباعي و نطلب من القهواجي أنو يحطلي غناية الأطلال لأم كلثوم ونقعد نتأمل في الجوه القادمة من كل فج عميق يدها مسخة بالحبّر متع الديمقراطية

أكيد برشا ناس باش تقلي إنتي مواطن سلبي و ممكن برشا تكون من فلول النظام البائد و الله يهلكو إلي علمكم هالكلمة القومجيّة و تحب تفسد علينا العرس الديمقراطي

طبيعي أنو صاحب الحجّة هاذي إلي يحكي على عرس و أنا في الحقيقة ماني نشوف كان في طهور ديمقراطي موش باش يتم إستعمال البنج فيه بالطبيعة ينسى أنو هو من قبل أنو يدخل في أنتخابات جنبا إلى جنب مع إلي يسميهم فلول النظام البائد و هو إلي باش يمشي ينتخب نهار23و يصوت (نشالله يسوطوه)في انتخابات فيها تجمعين

الحجة هاذي تندرج في إطار إكذب إكذب حتى تصدق نفسك و كذلك يمكن إدرجها في إطار الجمل ميراش حدبّتو ولو أنها كلها ربات الحدبّة من التطبيس و التلحيس

و بالتالي السؤال المنطقي و صيغة الموضوعية متاعو تكون كالأتي ...(علاش يا تيتوف ماكش ماشي نهار 23 تنتخب)

هكّة نجم نوضح موقفي ملي نسميه أنا فيستفال متع تهريج و نوضح علاش

أولا الكلام الي يقولو فيه حول استحالة إمكانية تزوير الإنتخابات في الصندوق هو كلام سليم و معقول لكن نساو الي التزوير ميتمش داخل الصندوق و حتى في عهد بن علي نفسو كانت العمليّة متع تزوير تصير خارج الصندوق

اليوم في تونس الأحزاب السياسية زادمة قوة فلوس ..إعانات...رشاوي..تبلعيط..رحالات...فلوس..هبات..شريان ذمم من غير برامج واضحة و الا مواقف ثورية تتمشى مع تطلعات شعب الكنتول العظيم في الكرامة و الحريّة و العدالة الإجتماعية

إضافة انو برشا أحزاب و الي تعتبر مرشح بارز للفوز في "الطهور الديمقراطي" تملك امكانيات مالية ضخمة "ناس تحكي بميات الملاين كاينها تحكي على عشرة ألاف " من دون أنها توضح لرأي العام التونسي مصدر الأموال هاذي و الي تحكي معاه يلك خويا مصادرنا منخرطينا ؟؟يعني ميزيش مشبوه و كمّل يكذب عيني عينك وكينو أحنا جاين من المريخ و إلا مناش عيشين معاهم في البلاد تو بلاد ربع شعبها ضاربو الفقر و مليون بطال و الهم و السخط و عاملة ثورة افرزها و اقع إجتماعي و إقتصادي متردي منين باش يجيب منخرطي أحزابها إلي هوما من الشعب هذا ميات الملاين ؟؟اللهم ممكن ثورة كرزّ و عداوها علينا

هاذي نقطة يعني ثمة إمكانية كبيرة أنو حزب من الأحزاب يجيب غالبية بشريان أصوات الناس و هكاكة خويا التونسي تكون بالرسمي شاركت في طهور متع ديمقراطية

النقطة الثانية و هي بالأساس تتعلق بمسألة تقنية منيش باش نحكي عالهيئة و التجاوزات و منين جات الهيئة هاذي و كفاش لأنو الموضوع هذا برك تحبلو 10 تدوينات

و إنما باش نحكي عالإعلام ...بالله فهموهالي هاذي كفاش تحكيو على إنتخابات ديمقراطية بإشراف إعلام بن علي

و كفاش تحكيو على إنتخابات نزيهة تحت ظل وزير اول مهوش حاشم كي يعترف انو زور انتخابات في عهد سابق و في ظل رئيس دولة ساهم في دعم الديكتاتورية و الإبقاء عليها

ياحاجتين يا أحنا بهايم برشا يا إنتم تصكو في حبوب الهلوسة إلي حكى عليها القذافي باش متراوش الشي هذا الكل

ونزيد زيادة اللاعب الأهم هو وزارة الداخلية يا بوقلب الي لليوم تحكي التقارير الحقوقية على تجاوزات مصارتش حتى ممكن في عهد بن علي و خلي عاد باش نحكيو على التجمعين الي ولاو نظاف وملي كانو جزء من الديكتاتورية باش يوليو جزء من تونس الجديدة و بالطبيعة المجلس التأسيسي مهوش باش يكون خالي منهم كيما الاحزاب الي طارحة نفسها ليوم كأحزاب معارضة لاحزاب السلطة مهاش خالية منهم و هكاكة مع شويّة تحالفات امورهم تولي هانية ويكثرو كالقرّاد وتولي عندهم كلمة

ثمة حاجة مهمة أخرى متخلنيش نمشي نهار 23 هو الإضراب الجوع الي عملوه جرحى الثورة والي بسبهم سيادتك ولّى عندك الحق تمشي تصوت في الطهور الديمقراطي بعد الي حكومة الغلبّة و رقود الجبانة منفذتش وعودهم ليها و كمل الي قتلو الشهداء فيهم شكون ترى و فيهم شكون غطاو عليه وجات في اك راس المغبون السرياطي لا قيم في والديه كان عامل و الا موش عامل في لخر هاكي نهاية الي يتبع الطحانة هوما يفصعو وتجي في راسوا

يعني مكانتش ثمة محاسبة و لا تحقيق جدّي يبرد على قلوب الإميمات إلي تحرقت على ولادها

كمّل الناس الكل و أغلب الاحزاب الي تتبنى خطاب مزدوج وقريبة برشا من الفوز بالسلطة متحكيش على تونس توّ و"توّ" موش متع اك الإنتهازي الي يوزع في الدخان على المراهقين سليم الرياحي و انما تونس توّ ...العدالة....المحاسبة...المصالحة الوطنيّة .

هو فهمّنا و كلابو؟

اليوم جمعتني الأقدار مع شلاكة من شلايك وزارة الإرهاب الي هي وزارة الداخلية ظروف كانت الصدفة وراها لأني الناس هاذم كنت نتحاشى برشا أني نقترب منهم أو نتعامل معاهم حتى أوراقي الرسميّة نصها ناقص بعدي الي تمشي لمركز باش طلع ورقة ترصيلك تبّحث

و كنت كيما أغلب التوانسة نعيش بهوية نصف مجهولة تقلي كيفاش نقلك ممكن مادم غي عهد بن علي زمن المعجزات و كل شي منطقي ومثال على ذلك انو في العهد السعيد متاعو كانت القايمة تدخل خضرا او زرقا او زنصفوريّة و تخرج حمرا

بالطبيعة المخلوع في السعودية و ما فيها باس نولي نحكيو عليه بالاسم و نشتموه و نمسحو بيه الأرض ايييه محلاها الحرية بموصفات تونسية تشتم و تثلب و تسب و ميكلمك حدّ

عاد قلنا أنو السيد هذا كان يحكي عالمناضلين الي عاشو أيام كحلة كي وجه "الزعبوع"الرئيس المخلوع في أقبيّة الداخلية على أنهم ناس جبورة على حد تعبيرو و أنهم ناس انتهازين كانو يستحقوا المعاملة هاكي

الحق منجمتش نكمل اني نسمع هالهرتقات و الريق البارد متع ناس تغطرست و هضمت و كلات حقوق التوانسة ومزالت ما أقتنعتش انو الي عملتو غالط و لو أنهم ما يقتنعوا كان تتعمللهم كوردة

على هاكة الناس هاذي مستعدة انها ترجع لسالف ممارستها متى لقات الفرصة و خاصة أنها مهاش نادمة و مزالت تتحسر بصفة غير مباشرة على العهد السعيد .

و بالتالي فانو عمليات التبلعيط و الاصلاح و اعادة هيكلة وزارة الارهاب و دروس حقوق الانسان مهاش باش تعطي نتيجة مع المجرمين هاذم لانو المشكلة ببساطة ووضوح هي مشكلة أشخاص

إنتي ولدّ حلال أبعثلي دينار تونزيانا

الشعبّ التونسي العظيم شعب متحيل بالضبطّ و إن كان بدرجات متفاوتا تختلف من شخّص إلى و أكبر دليل تحيلو على بن علي رقدلو حلّفة لين الزعبوع جدّت عليه أنو أمورو في العنبّرو مسيطر بطريقة محكمّة على الوضع الا أن تفاجأ بكف لا يقرا لا يكتب

اليوم مثلا شعرة و نكون ضحيّة من ضحايا التحيّل هذا و ممكن السيد الي نوى يتحيّل عليا باش يخليني محلّ تندر الى زمن بعيد خاصة و انو معاتش يجي منو نتندرو بلبيا لانو بان بالكاشف انو هوما خاطيهم و احنا الليبيّة

المهم قاعد في أمان اللّه نمارس في طقوس التأمل في كشخ العباد الي الواضح أنو الوضع العام في البلاد معكوس عليها بالواضح و انو العملية التفليقية الانتخابية تحفرت عليها لدرجة أنو الواحد يحمّد ربي مثماس سلاح سينون الي تقولو صباح الخير يفرغ فيك رشاش

هكاكة و تجيني أبال من رقم منعرفوش ...المرة لولة طفيت و قلت هذا مدام عمّل ابال راو حاشتو بيا ميزيش حاشتو بيا و نخسر عليه تليفون برشا عالجحيش

زاد شوية و عاو ابال ..مجاوبتش و عاود لين فديت قلت بلكش يطلع واحد من الرهوط الي نعرفها في حاجة ماسة ليّا و تصيرلوش حاجة يقعد ضميري يأنب فيا موش حرام فيه 100 فرنك

هيا سيدي كلمت نومرو اول ما قلت ألو جاوبني صوت أول مرة نسمعو "صوت ذكر باش مخكم ميسرحش بعيد" اول مقالي خويا انا منعرفكش اما تجمّ تعمل عليا مزيّة و ظاهر فيك ولد حلال ؟

جاوبتو و انا مستغرب كفاش عرف الي أنا جونتي و باهي من كلمة ألو في التليفون تي هو فرويد وميطلعهاش سبحان الله و برّ و ماك تعرف القاعدة الي تقولو اذا التونسي كبرلك راسك راو باز حاشتو بحكاية

مكان مني الي ان قتلو تفضل ..قالي انا عندي كرهبة و طايح أونبان تنجمش تصبلي دينار في تليفون باش نكلم النجدة

الحق ضربتها تبهيمة متع 20 ثانية و انا نحلل في الحكاية تو النجدّة بلاش ...ياسيد هذا سلعة بالضبط الى درجة انو حاطط خيشة في وجهو يا هو بهيم برشا لدرجة انو يعتقد انو لحكاية باش تتعدى على واحد

الحق جاوبتو و قتلو انو معنديش دينار اما عندي ليه حل انو ينحي الشارجور متع التليفون ويحطو في بلاصة البتري و يسمي بسم الله مجراها و مرساها و بحول الله البان يختفي و ينجم يروح

مرحبا بيكم

لأنو تونس قبل 14 جانفي مهاش تونس بعد 14 جانفي علاّ هاكة التدوين زادة مهوش هو بيدو و بالتالي فإنو كان لازم تكون ثمّة مدونة جديدة للعهد السعيد الجديد