الالترّاس حبوّا يطيحو حكّم العسكّر ياخي طيحهم العسكر من سطح ستاد

أكيد البّارح النّاس الكلّ تبعت "ببالغ الحزّن و الأسى "(شويّة لوغة خشبية تتماشّى مع الوقفّ) البتّوار إلي تحلّ في ستادّ المصري ببورسعيد و الي للأسف راح ضحيّتو 75 شابّ من خيرة شبّاب مصّر إي نعمّ خيرّة شباب مصّر لأنو الي متبع الأحدّاث في مصرّ يعرف أنو شباب الألترّاس الأهلي كان في الصفّوف الأولى في ثورّة 25 يناير و حتى بعد ماتمّ خلّع مبّارك قعد الالتراس يمارس في رياضة خريّان الكيف للمجلّس العسكري و بالطبيعة الشي هذا كلّو موثقّ هنّا و هنّا

أولا قبّل منبدّاو في صلبّ الموضوع هات نعملو تعريف للألترآس أو الإلترا بلهجتنا أحنا

الإلتراس عزيزي القارىء هي كلّمة لاتينية في الأصل و المقصود بيها رهط من الرهوّط الي تشجع في فريق معيّن و موش لازم ندخّلو في التاريخ عند الغوغل كان تحبّ تلّوج .لكن أهمّ حاجة لازم تعرفها على هؤلاء الي عندهم دودّة الجمعيّة هو الولاّء للجمعيّة و كي يدخل للفيراج لازمو تسعين دقيقة مود فيبرور كالرسول ميقعدش و بلحوحو طالع بالأهازيج حتى يكونش صاكك حارّة بلاش لازمو ديما يفبري و أهم حاجة باش تولي التراس خشين لازمك تواكب الديبلسومنات متع الجمعية سواءا داخل الحصون او خارجها

و باش منخرججش برشّا عالموضوع نعاود نرجّع للاخوة المنكوبين في ستاد المصّري الي حقيقة تصفّاو بدّم بارد و بوحشية كبيرة الي طيشوه من سطّح الستاد و اليد غروه و الي استفعلو فيه لدرجّة خلاّت بعض اللاعبين كيما بو تريكة يستقيلو من لعب الكورة بعدّ الي السيدّ في بالّو ماشي يكوّر لقى روحو يخدّم مسعفّ

الاخوة المنكوبين في أعمّارهم بما أنهم تجرؤوا و خراو في كيف العسكر و الامن الداخلي كان لازمهم شيقول المصري "علقة موت عشان يتربّوا" و على هاكّة الأمن المصري مقصّرش في اداء و ظيفتو القذّرة و حضّر لمباراة معروفة بكونها مشحونة بحالة احتقان بأعداد محتشمّة و خلاّ الشبيحة بجميع انواعها و الفصايل ومفصليّات الأرجل تتسلح بمّا تيسر و سقّط من الأسلحة البيضاء و دخلّها للتران

و تجي تشوف قرّار سي موشير "خرّى" رفّع حالة الطوارىء في الانفلات الأمني و مقصّرش سي وزير الداخلية متاعهم كي رجّع الجمهور للملعبّ في اطار انو طيب ّ قنوّات و ينجمّ يسلكهّا اذا فرضنا انو ثمة بلحق نية متع تسليّك

كمّل زيدّ معاهم تطفيّة الضوّ و قد بدّات ناس هابطّة لتران باش هكاكة اقتل و أفعل و ميّراك حدّ كمل الحيوان الي سكّر الباب على الالتّراس و قعدّ ياكل في الكاكوية رفقة البوليس و يتفرج في فيلمّ الأكشن

وهوّ كي تجي تشوف السيدّ مشير جعبّة سلكها من شيرتيّن و جاتو في صلاّح

خاصة السيّد لقى فرصة أنو يعمل دهنّة سرفاسور لوجهو ويبضو شوية بعد ما شبّع تسويد و خرج البّارح في الاعلام بصورة الحازّم المنقذّ و الحنّون و رجلّ القانون وهو يتوعدّ بالمحاسبّة ( تي حاسب الي عندك في الحبّس ساعة مبارك وغيروّ و بعد احكي عالمحاسبّة)

الصورة هاذي خلاّت الناس البارّح تحنّ لعهدّ المتراك في ثنائية ابتزازية حقيرة الحريّة مقابّل الأمن و هذا ما صرّحت بيه أعداد لا بأس بيها من المواطنّين

كمّل عليهم التسويق الطيحني متع صحافي مبارك الي كانو يحاولو يقنعو النّاس انو المترّاك هي الحلّ و تبدّى المترّاك من التيرّان لتنسحب على المظاهرّات السلّمية

و ثمّة مستوى اخر جانبي سياسي قذّر مثلاّ البارح سمعت نائب من الاخوان يحكي على منع الريّاضة مدام مفيهاش أخلاق في اتصال لدريّم سبور يولي يجاوبو الممثلّ المصري فاروق الفيشاوي و تلحم بين التقدّمية و الرجعيّة و ناس مزال دمهمّ في القاع و جثثهم متهزتّش

أكيد موش هذا المستوى الوحيدّ القذر المستوى الاخر موش سياسي و انما لبرالي وصولي وقت تجي مثّلا في قناة دري مكورة من شبكة الطحين لمبارك و تستغل المأساة متع العباد و طيح نازل فيها طول وعرض للاشهارات متع البطاطا المقليّة و الاتصالات و الشعبّ قاعد يتقلى و تستقبل في تلفونات و الحسابة بتحسبّ عيبّ أكبرّ عيبّ صحيح ثمة التزمات أما كان تشدهّا كل ربع ساعة بثّ نص شاعة اشهار هاذي و مع اقو معنا نطمنوكم على ولادّكم هاذي القذارة بعينّها

أخيرا مجلسّ الشعبّ الثوري مكانّش ثوري خلاص و قّت يحكي على تشكيل لجنة بعد اسبوعين و تحقيق ووو و غيرو من ممارسات العهدّ البائد

المفيد الله يرحم الشهدّاء و لعنة الله علي ما يحشمش و يقال قد تقتلون الثوّار لكنّ ابدا لن تقتّلوا الثورّة